O Mariscal D. Pero Pardo de Cela Aguiar e Ribadeneira naceu en Betanzos no ano 1425.
Señor das terras de Mondoñedo polo ano 1473, loitou á fronte da revolta dos "irmandiños"
contra o poder dos Reis Católicos e contra a autoridade do Bispo de Mondoñedo.
Refuxiouse no Castelo que tiña no alto do Monte da Frouseira e, despois de ser asediado
polas tropas inimigas capitaneadas por Mudarra, foi preso o 4 de Decembro de 1483 grazas
á traizón dalgúns dos seus criados.
Tras a súa captura Pardo de Cela e o seu fillo de 22 anos foron conducidos a Mondoñedo
para ser axusticiados. A súa filla e a muller viaxaron a Castela para pedir clemencia aos Reis e,
segundo conta a lenda, cando regresaban co indulto foron entretidas por uns clérigos na Ponte de Ruzos,
á entrada da cidade.
Mentres, na Praza da Catedral, o Mariscal e o seu fillo eran entregados ao verdugo que lles cortaba
a cabeza o 17 de Decembro de 1483. A lenda di que a cabeza do Mariscal rodou pola praza
ata a porta da Catedral dicindo: "Credo, credo, credo".
Desde entón na cidade a Ponte coñécese como "Ponte do Pasatempo". Os restos de Pardo de Cela
e do seu fillo na actualidade descansan na Capela Maior da Catedral.
